2011-2015 წლებში ხელბურთში საქართველოს გოგონათა და ჭაბუკთა ნაკრები გუნდების მზადების პროგრამა განიხილეს სპორტისა და ახალგაზრდობის საქმეთა კომიტეტის დღევანდელ სხდომაზე.
საქართველოს ხელბურთის ეროვნული ფედერაციის პრეზიდენტის, ზაზა დოლიძის განცხადებით, ხელბურთით საქართველოში ამ ბოლო დროს სულ უფრო მეტი მოზარდი ინტერესდება, და ამის დასტურია ის ფაქტი, რომ სპორტის ამ სახეობაზე არჩევანი ასზე მეტმა საშუალო სკოლამ გააკეთა. მისივე განცხადებით, ეს კი იმის წინაპირობაა, რომ ქართველი ხელბურთელები ევროპის ახალგაზრდულ ოლიმპიურ ფესტივალზე, რომელიც 2015 წელს თბილისში გაიმართება, წარმატებით გამოვლენ. ზაზა დოლიძემ კანონმდებლებს დეტალურად გააცნო ახალგაზრდა ხელბურთელთა მზადების პროგრამა და ამ პროგრამის განხორციელებაში მხარდაჭერა სთხოვა.
სხდომაზე აღინიშნა, რომ ნაკრები გუნდების მზადებისა და საჭირო ინვენტარით უზრუნველყოფის თვალსაზრისით, ხელბურთის ეროვნული ფედერაცია სახსრების მოსაზიდად მზადაა და ამისათვის გარკვეული გეგმებიც აქვს შემუშავებული. საპარლამენტო კომიტეტის თავმჯდომარემ, გიორგი ასანიძემ ხელბურთის ეროვნული ფედერაციის მესვეურთ, კომიტეტის სახელით, დახმარება აღუთქვა.
სპორტისა და ახალგაზრდობის საქმეთა კომიტეტში ინფორმაციებს ევროპის ახალგაზრდულ ოლიმპიურ ფესტივალზე საქართველოს წარმატებით გამოსვლისათვის მზადების შესახებ მომავალში სპორტის სხვა სახეობების ეროვნული ფედერაციების მხრიდანაც მოისმენენ.
დღესვე კომიტეტში სამსახურებრივ-გამოყენებითი სპორტის ფედერაციის პრეზენტაცია გაიმართა. ფედერაციის საქმინობასა და სამომავლო გეგმებზე ფედერაციის პრეზიდენტმა მალხაზ ბაძაღუამ ისაუბრა. "ეს არის სპეციფიკური ფედერაცია, რომლის შექმნაც მნიშვნელოვანი ფაქტია. მიგვაჩნია, რომ ფედერაციის საქმიანობა მხარდაჭერას იმსახურებს და იმედს გამოვთქვამ, რომ გარკვეული სამსახურები, როგორიცაა სამაშველო, სახანძრო, შსს, უშიშროება და სხვა, და რომელთაც სამსახურებრივად შეხება აქვთ გამოყენებითი სპორტის სახეობებთან, აქტიურად ჩაერთვებიან ფედერაციის საქმიანობაში", – განაცხადა გიორგი ასანიძემ.
